દેશમાં ધારાસભા-લોકસભા સહિતની ચૂંટણીઓ સમયે મતદાન પુર્વેના 48 કલાકના સાયલન્સ પીરીયડમાં થતા આડકતરા પ્રચારમાં પ્રથમ વખત ચૂંટણી પંચે ભાજપ-કોંગ્રેસ તથા માર્કસવાદી સામ્યવાદી પક્ષનો નોટીસ પાઠવી મતદાનના દિને મતદારોને તેમની તરફેણમાં મતદાન કરવા અથવા શાસકને ફરી ચુંટવા કે પરાજીત કરવાની અપીલ કરતા ટવીટ બદલ નોટીસ ફટકારી છે.

ગઈકાલે ત્રિપુરામાં ધારાસભા ચૂંટણીના દીને થયેલા ટવીટ બદલ આ નોટીસ અપાઈ છે. ચૂંટણીપંચના એક સિનીયર અધિકારીના જણાવ્યા મુજબ આગામી તા.27ના રોજ મેઘાલય અને નાગાલેન્ડની ધારાસભા ચૂંટણી માટે મતદાન યોજાવાનું છે તેમાં હવે આ પ્રકારે આચાર સંહિતાનો ભંગ થાય નહી તે માટે આ પ્રકારે ચેતવણી પણ આપવામાં આવી છે અને અમો સ્પષ્ટ સંદેશ પાઠવવા માંગીએ છીએ કે 48 કલાકનો જે સાયલન્સ પીરીયડ છે તેમાં આ પ્રકારે કોઈ પ્રચાર થવો જોઈએ નહી અને છતા તેનો ભંગ થશે તો નિયમ મુજબ પગલા લેવાશે.