રામ લલ્લાની પ્રાણ પ્રતિષ્ઠા માટે રાષ્ટ્રપતિને આમંત્રણ

જાન્યુઆરી 2024નો મહિનો ઐતિહાસિક પૃષ્ઠોમાં નોંધાયેલો છે કારણ કે ઉત્તર પ્રદેશના અયોધ્યામાં બની રહેલા ભવ્ય રામ મંદિરનું ઉદ્ઘાટન આગામી 22 જાન્યુઆરી 2024ના રોજ થવા જઈ રહ્યું છે. 22 જાન્યુઆરીએ અયોધ્યામાં રામલલ્લાનો પ્રાણ પ્રતિષ્ઠા મહોત્સવ પણ યોજાવા જઈ રહ્યો છે. જેને લઈને શ્રી રામ જન્મભૂમિ તીર્થ ક્ષેત્ર ટ્રસ્ટ દ્વારા દેશના મહાનુભાવો અને રાજકીય પાર્ટીઓને આમંત્રણ આપવામાં આવી રહ્યું છે. ત્યારે રામ લલ્લાની પ્રાણ પ્રતિષ્ઠા માટે દેશના રાષ્ટ્રપતિ દ્રૌપદી મુર્મૂને પણ આમંત્રણ આપવામાં આવ્યું છે.

 અયોધ્યા નગરીમાં રામ લલ્લાના અભિષેકની તૈયારીઓ અંતિમ ચરણમાં છે. દેશના સંતો અને જાણીતા વ્યક્તિઓ સહિત સમાજના વિવિધ વર્ગોના 11,000 થી વધુ લોકો આ સમારોહમાં હાજરી આપે તેવી અપેક્ષા છે. આવી સ્થિતિમાં શ્રી રામ જન્મભૂમિ તીર્થ ક્ષેત્ર ટ્રસ્ટ તમામ તૈયારીઓ પૂર્ણ કરવામાં વ્યસ્ત છે. રામ મંદિર ટ્રસ્ટ પ્રાણ પ્રતિષ્ઠામાં હાજર રહેનારા મહેમાનો અને આમંત્રિત સભ્યોને ભેટ આપવાની વ્યવસ્થા કરી રહ્યું છે. ટ્રસ્ટ તરફથી પ્રાપ્ત માહિતી અનુસાર રામ મંદિરના પાયાના ખોદકામ દરમિયાન કાઢવામાં આવેલી રામજન્મભૂમિની માટીને બોક્સમાં પેક કરીને પ્રાણ પ્રતિષ્ઠા સમારોહમાં ઉપસ્થિત મહેમાનોને અર્પણ કરવામાં આવશે.