વડા પ્રધાન નરેન્દ્ર મોદીએ ગઈ કાલે એક બેઠકમાં કહ્યું હતું કે, G20ની ભારતની અધ્યક્ષતા સંપૂર્ણ દેશની છે અને તે આપણા દેશની તાકાત દર્શાવવાની એક અનોખી તક છે.  પ્રધાનમંત્રીએ ભારતની G-20 અધ્યક્ષતા સાથે સંબંધિત પાસાઓ પર રાજ્યપાલો, મુખ્ય પ્રધાનો અને કેન્દ્રશાસિત પ્રદેશોના લેફ્ટનન્ટ ગવર્નરો સાથે વિડિયો કોન્ફરન્સ દ્વારા  બેઠકની અધ્યક્ષતામાં વાત કહેવામાં આવી હતી. ટીમ ભાવનાના મહત્વ પર ભાર મૂકતા, વડા પ્રધાને આ ઇવેન્ટના સંદર્ભમાં તમામ રાજ્યો અને કેન્દ્રશાસિત પ્રદેશોનો સહયોગ પણ માંગ્યો હતો. તેમણે કહ્યું, 'આ રીતે આ ઈવેન્ટ આપણા દેશના દરેક ભાગની વિશિષ્ટતા દુનિયા સમક્ષ લાવવામાં મદદ કરશે.'
ભારતને એક 'બ્રાન્ડ' તરીકે વિકસાવવું 
ભારતના G-20 અધ્યક્ષપદ અને તેનાથી સંબંધિત વિવિધ કાર્યક્રમો પર ધ્યાન દોરતા વડાપ્રધાને કહ્યું કે, દેશે આ તકનો ઉપયોગ વેપાર, રોકાણ અને પ્રવાસન સ્થળોને પ્રોત્સાહન આપવા માટે કરવો જોઈએ. સાથે જ ભારતને એક 'બ્રાન્ડ' તરીકે વિકસાવવું પડશે. તેમણે સમગ્ર સરકાર અને સમગ્ર સમાજના દૃષ્ટિકોણથી G-20 કાર્યક્રમોમાં લોકોની ભાગીદારી સુનિશ્ચિત કરવાની જરૂરિયાત પર પણ ભાર મૂક્યો હતો.